Editor's choices of Myanmar Books

ယောန် - ပေါလ်ဆာ(ရ)ထာ လက်ရွေးစင် (Selected Works of Jean-Paul Sartre) (မြင့်သန်း) (ကဗျာ / အက်ဆေး / ပေးစာ / မိန့်ခွန်း / ဟောပြောချက်, ဝတ္ထုတို)

၁၉၆၄ ခုနှစ် စာပေဆိုင်ရာ နိုဘယ်ဆုကို ငြင်းပယ်ခဲ့သော အတ္တဘဝ အမှန်ဝါဒီ ပြင်သစ်စာရေးဆရာကြီး ယောန် - ပေါလ်ဆာ(ရ)ထာ (Jean-Paul Sartre)၏ Intimacy ဝတ္ထုတိုပေါင်းချုပ်တွင် ပါရှိသော ဝတ္ထုတိုများအနက် တရင်းတနှီး၊ နံရံ၊ အခန်း၊ အေရိုစထရိုးတပ်(စ်)ဟူသော ဝတ္ထုတို (၄) ပုဒ်နှင့် ထွက်ပေါက်မရှိ ဟူသော ပြဇာတ် (၁) ပုဒ်၊ အတ္တဘဝ အမှန်ဝါဒသည် လူသားဝါဒဟူသော အက်ဆေး (၁) ပုဒ်တို့ကို စုစည်း၍ ဘာသာပြန်ဆိုပေးထားခြင်း ဖြစ်သည်။

ကမ္ဘာကို ကိုင်လှုပ်သော တရုတ်ပြည် (မြသန်းတင့်) (သမိုင်း)

Jack Belden ရေးသားသည့် China Shakes the World စာအုပ်ကို ဘာသာပြန်ဆိုထားခြင်း ဖြစ်သည်။ တရုတ်ပြည်တွင် ပြည်တွင်းစစ် စ‚တင် ဖြစ်ပွားအချိန်မှ တရုတ်ကွန်မြူနစ်တို့ ချန်ကေရှိတ်စစ်တပ်ကို အနိုင်ရလိုက်သည့် ၁၉၄၈ - ၄၉ ခုနှစ်အထိ အဖြစ်အဖြစ်များကို အသေးစိတ် မှတ်တမ်းတင်ထားသော စာအုပ်ဖြစ်သည်။ တရုတ်ပြည်အနှံ့ အင်အားသစ်ကြီးတစ်ခုသဖွယ် စုဝေးပေါက်ကွဲလာသော တရုတ်ပြည်သူတို့၏ ဆန္ဒပြင်းပြမှု စိတ်ဓာတ်အင်အား၊ မြေယာတော်လှန်ရေး၊ စစ်ရေးပဋိပက္ခ၊ စစ်အနိုင်အရှုံး၊ အစရှိသည်တို့ကို ခရီးသွားမှတ်တမ်းတစ်ခု၊ သမိုင်းမှတ်တမ်းတစ်စောင်အနေဖြင့် ရေးသားမှတ်တမ်းတင်ထားခြင်း ဖြစ်သည်။

အခြေခံစိုက်ပျိုးရေး သိပ္ပံပညာ (Basic Agricultural Science) (အတွဲ ၅) (ဒေါက်တာမျိုးကြွယ်) (စိုက်ပျိုးရေး)

ရေဆင်းစိုက်ပျိုးရေးတက္ကသိုလ်တွင် သရုပ်ပြရာထူးမှသည် ပါမောက္ခချုပ်ရာထူးအထိ တာဝန်ထမ်းဆောင်ခဲ့သူ စာရေးသူက ဤစာအုပ်တွင် ဂျုံးနှင့် ပြောင်းဖူး၊ သီးနှံသစ်တော၊ ၊ ပန်းမန်၊ ဆေးဖက်ဝင်အပင်ဆိုင်ရာ အကြောင်းအရာများကို ရေးသားရှင်းလင်းထားသည်။ တောင်သူဦးကြီးများ၊ စိုက်ပျိုးမွေးမြူရေးပညာအထက်တန်းကျောင်းနှင့် သိပ္ပံကောလိပ်များနှင့် တက္ကသိုလ်များရှိ ကျောင်းသား၊ ကျောင်းသူများ စိုက်ပျိုးမွေးမြူရေးပညာမှ စ,တင်၍ အဆင့်မြင့်စိုက်ပျိုးရေးနည်းပညာများကို လေ့လာရာတွင် အထောက်အကူပြုစေမည့် စာအုပ်ဖြစ်သည်။

အခြေခံစိုက်ပျိုးရေး သိပ္ပံပညာ (Basic Agricultural Science) (အတွဲ ၆) (ဒေါက်တာမျိုးကြွယ်) (စိုက်ပျိုးရေး)

ရေဆင်းစိုက်ပျိုးရေးတက္ကသိုလ်တွင် သရုပ်ပြရာထူးမှသည် ပါမောက္ခချုပ်ရာထူးအထိ တာဝန်ထမ်းဆောင်ခဲ့သူ စာရေးသူက ဤစာအုပ်တွင် ပျားမွေးမြူရေး၊ နွားနို့နှင့် နို့ထွက်ပစ္စည်း၊ နှံစားသီးနှံ၊ သဘာဝဩဂဲနစ်မြေဩဇာ၊ ရွက်ဖြန်းမြေဩဇာ၊ စပျစ်စိုက်ပျိုးရေး၊ စိုက်ပျိုးမွေးမြူရေး၊ သစ်တော၊ သဘာဝပတ်ဝန်းကျင်ဆိုင်ရာ အကြောင်းအရာများကို ရေးသားရှင်းလင်းထားသည်။ တောင်သူဦးကြီးများ၊ စိုက်ပျိုးမွေးမြူရေးပညာအထက်တန်းကျောင်းနှင့် သိပ္ပံကောလိပ်များနှင့် တက္ကသိုလ်များရှိ ကျောင်းသား၊ ကျောင်းသူများ စိုက်ပျိုးမွေးမြူရေးပညာမှ စ,တင်၍ အဆင့်မြင့်စိုက်ပျိုးရေးနည်းပညာများကို လေ့လာရာတွင် အထောက်အကူပြုစေမည့် စာအုပ်ဖြစ်သည်။

“စစ်မှန်တဲ့ ယောက်ျားပီသမှုနဲ့ အမျိုးသမီးတိုင်း လိုချင်တောင့်တတဲ့” စံပြယောက်ျား (သုခကျော်) (သုတစာပေ)

Mark Manson ရေးသားသည့် Models: Attract Women Through Honesty စာအုပ်ကို ဘာသာပြန်ဆိုထားခြင်း ဖြစ်သည်။ မိမိဘဝ မိမိဘာသာ ဦးဆောင်နိုင်သူ၊ မိမိတန်ဖိုး မိမိသိသူ၊ မိမိခံစားချက်ကို တည်ငြိမ်စွာ ကိုင်တွယ်နိုင်သူကို စစ်မှန်သည့် ဆွဲဆောင်မှုရှိသော ယောက်ျားဟု ခေါ်ဆိုနိုင်ရာ ထိုဆွဲဆောင်မှုကို ရိုးရာနည်းလမ်းများ၊ လှည့်ကွက်များနှင့် ပရိယာယ်များကို အသုံးမပြုဘဲ မည်သို့တည်ဆောက်ရမည်ဆိုသည်ကို စိတ်ပညာနှင့် လူမှုရေးရှုထောင့်မှ ရှင်းလင်းရေးသားထားသော စာအုပ်ဖြစ်သည်။

အခက်အခဲကြားက ရှေ့ဆက်လိုက်ပါ (ပိုင်သုတ) (သုတစာပေ)

Ryan Holiday ရေးသားသည့် The Obstacle Is the Way: The Timeless Art of Turning Trials into Triumph စာအုပ်ကို ဘာသာပြန်ဆိုထားခြင်း ဖြစ်သည်။ ‘လုပ်ဆောင်မှု၏ အဟန့်အတားသည်ပင် လုပ်ဆောင်မှုကို ရှေ့သို့တွန်းပို့၏။ လမ်းခုလတ်တွင် ပိတ်ဆို့နေသောအရာသည်ပင် သွားရမည့်လမ်းစ ဖြစ်လာ၏ ’ ဟူသော ရောမဧကရာဇ် Marcus Aurelius ဆိုစကားကို မဏ္ဍိုင်ပြုကာ သမိုင်းဝင် ခေါင်းဆောင်များနှင့် စီးပွားရေးလုပ်ငန်းရှင်များ အခက်အခဲများကို မည်သို့ရင်ဆိုင် ကျော်လွှားခဲ့ကြသည်ဆိုသည့် လက်တွေ့ သာဓကများနှင့်အတူ ထည့်သွင်းရေးသားရှင်းလင်းထားသော စာအုပ်ဖြစ်သည်။ အခက်အခဲများကို ကျော်လွှားရန်နှင့် အကျိုးရှိအောင်အသုံးချရန် အဓိက မဏ္ဍိုင် (၃) ရပ်ဖြင့် ပိုင်းခြားဖော်ပြထားသည်။

စိတ်ကို စိတ်ဖြင့် ကုစားခြင်း (“သင့်စဉ်းစားပုံကို ပြောင်းလဲခြင်းဖြင့် သင့်ခံစားမှုများကို ပြောင်းလဲပါ”) (ဒေါက်တာမြင့်လွင် (စိတ်ပညာ)) (လူမှုရေးနှင့် စိတ်ပညာ)

Dennis Greenberger နှင့် Christine A. Padesky တို့ ပူးတွဲရေးသားသည့် Mind Over Mood: Change How You Feel By Changing the Way You Think စာအုပ်ကို ဘာသာပြန်ဆိုထားခြင်း ဖြစ်သည်။ စိတ်ကျရောဂါ, စိုးရိမ်စိတ်လွန်ရောဂါ, ဒေါသ, အပြစ်တင်စိတ်, ရှက်စိတ်တို့ကြောင့် စိတ်ထိခိုက်ခံစားနေရသူများအတွက် စိတ်ကုထုံးတစ်ခုဖြစ်သည့် သိမှု - အပြုအမူကုထုံး (Cognitive behavioral therapy (CBT)) အကြောင်းကို အခန်း (၁၆) ခန်းခွဲ၍ အသေးစိတ် ရှင်းလင်းရေးသားထားသော စာအုပ်ဖြစ်သည်။

ဗုဒ္ဓဝါဒီ ဘာသာမဲ့တစ်ဦး၏ ယုံကြည်မှုရှင်းတမ်း (မောရိသျှ) (ဘာသာရေး)

Stephen Batchelor ရေးသားသည့် Confession of a Buddhist Atheist စာအုပ်ကို ဘာသာပြန်ဆိုထားခြင်း ဖြစ်သည်။ ငယ်ရွယ်စဉ်ကတည်းကပင် အရှေ့တိုင်းအတွေးအခေါ်နှင့် ဗုဒ္ဓဘာသာကို အထူး စိတ်ဝင်စားခဲ့ပြီး အိန္ဒိယ၊ ကိုရီးယားနှင့် ဥရောပတို့တွင် ဗုဒ္ဓဘာသာကို နှစ်ပေါင်းများစွာ လေ့လာကျင့်ကြံခဲ့ပြီးသည့်နောက် ဗုဒ္ဓဝါဒကို မိရိုးဖလာယုံကြည်မှုအစား လူဝတ်ကြောင်ယုံကြည်မှုဖြင့် ချဉ်းကပ်နိုင်ရေး ခေတ်ပြိုင်ယုံကြည်မှုမျိုးတို့ကို ဆန်းသစ်သောရှုထောင့်များနှင့် ကိုယ်ရေးအတ္ထုပ္ပတ္တိဆန်ဆန် စိတ်ဝင်စားဖွယ်ကောင်းအောင် တင်ပြမျှဝေထားသောစာအုပ် ဖြစ်သည်။ ဗုဒ္ဓဘာသာအား ဂုဏ်ထူးဖော် ချီးကျူးဖို့သက်သက် ရေးထားသော စာအုပ်မျိုး မဟုတ်ဘဲ၊ ယုံကြည်ခြင်းနှင့် သံသယ၊ မိရိုးဖလာနှင့် ခေတ်သစ်လက်ခံမှု၊ ဘာသာရေးနှင့် လက်တွေ့ကျမှုတို့အကြား ဆက်စပ်မှုတို့အား ရဲရဲဝံ့ဝံ့ မေးခွန်းထုတ်ထားသည်။ ဗုဒ္ဓဘာသာဝင် ဘုန်းတော်ကြီးအဖြစ် နေထိုင်ခဲ့ဖူးသူတစ်ဦးအနေဖြင့် ထိတွေ့ရင်ဆိုင် ခံစားခဲ့ရသည့် ယုံကြည်မှုဆိုင်ရာအတွေ့အကြုံများ၊ သမိုင်း၊ ဒဿနများနှင့် ဘာသာရေးဆိုင်ရာ ဆန်းစစ်မှုများကိုလည်း မျှဝေထားသည်။ ဗုဒ္ဓဘာသာကို ယုံကြည်သက်ဝင်ကြသောသူများသာမက ဘာသာရေးအပေါ် သံသယရှိသူ၊ ဘာသာမဲ့သူနှင့် ဘဝအဓိပ္ပါယ်ကို ဆန်းစစ်ဝေဖန်လိုသူများ စိတ်ဝင်စားမည့် စာအုပ်ဖြစ်သည်။

“ပဋ္ဌာန်းကို ရွတ်ဖတ်ရုံသာမဟုတ်၊ နေ့စဉ်ဘဝထဲမှာ သိမြင်နားလည် ကျင့်သုံးနိုင်စေဖို့” နေ့စဉ်ဘဝထဲက ပဋ္ဌာန်း (ဉာဏ) (ဘာသာရေး)

မိမိကြုံနေရသည့် အရာများကို အပေါ်ယံရလဒ်တစ်ခုအနေဖြင့်သာ မကြည့်ဘဲ ၎င်းအရာ ဖြစ်လာဖို့ ဘာတွေ ထောက်ပံ့ခဲ့တာလဲ၊ ဘာတွေ ဆက်စပ်နေခဲ့တာလဲ၊ ဘယ်အကြောင်းတွေ ပြောင်းရင် နောက်ရလဒ်တစ်ခု ပြောင်းနိုင်မလဲ အစရှိသည်တို့ကို ပဋ္ဌာန်းရှုထောင့်မှ ကြည့်နိုင်အောင် အလင်းပြမည့်စာအုပ်ဖြစ်သည်။ ပဋ္ဌာန်းတရားတော်ကို နားလည်သဘောပေါက်ရုံမျှဖြင့် ဘဝပြဿနာအားလုံး မပြေလည်နိုင်သော်လည်း ဖြစ်နေသည်ကို သိရှိနေသောကြောင့် အကြောင်းအခြေအနေကို နားလည်ပြီး ကောင်းအောင် ပြန်ဖန်တီးနိုင်ပုံ၊ ပဋ္ဌာန်းကို ရွတ်ဖတ်သရဇ္ဈယ်ရန် တရားတော်အနေဖြင့် မမြင်ဘဲ ဖြစ်, ပျက်နေသည့် သဘာဝတရားအဖြစ် မြင်က အကျိုးရှိပုံ အကျယ်တဝင့် ရှင်းလင်းရေးသားထားသည်။

ခေါင်းဆောင်မှု ဆောင်းပါးတွဲနှင့် အခြားဆောင်းပါး၊ ကဗျာများ (ကျော်လင်းတူ) (ကဗျာ / အက်ဆေး / ပေးစာ / မိန့်ခွန်း / ဟောပြောချက်, စီမံခန့်ခွဲမှု)

စာရေးသူ ရေးသားသည့် စီမံခန့်ခွဲမှု၊ ခေါင်းဆောင်မှု၊ နိုင်ငံရေး၊ စီးပွားရေး၊ သိပ္ပံနှင့် အတွေးအမြင်ဆောင်းပါးများကို အပိုင်း (၅) ပိုင်းခွဲ၍ ဖော်ပြပေးထားသော စာအုပ်ဖြစ်သည်။