Editor's choices of Myanmar Books

နှစ်ကြီးသမား (နတ်နွယ်) (ဝတ္ထုရှည်)

ဆရာနတ်နွယ်၏ ပဉ္စမြောက် ပင်ကိုယ်ရေး လုံးချင်းဝတ္ထုရှည်ကြီးဖြစ်သည်။

ကာတွန်းရုပ်ရှင် လို - တို - ရှင်း (အော်ပီကျယ်) (အနုပညာ / ဖျော်ဖြေရေး)

ကာတွန်းရုပ်ရှင်သမိုင်းကြောင်း၊ ကာတွန်းရုပ်ရှင်၏ သဘောသဘာဝ၊ ကာတွန်းရုပ်ရှင်ဖန်တီးရာတွင် လိုက်နာရမည့် စည်းမျဉ်းများ၊ ကာတွန်းရုပ်ရှင်ပါ ကာတွန်းတစ်ကွက်ချင်းစီ ရေးဆွဲပုံအပါအဝင် ကာတွန်းရုပ်ရှင် ဖန်တီးခြင်းဆိုင်ရာ သိကောင်းစရာများကို သရုပ်ဖော်ပုံများနှင့်တကွ ရှင်းလင်းရေးသားထားသော စာအုပ်ဖြစ်သည်။

လှေခွက်ချည်းကျန် အလံမလှဲ (ထက်မြက်) (အတ္ထုပ္ပတ္တိ / ကိုယ်တွေ့မှတ်တမ်း)

ဘဝလမ်းခရီးတွင် စိတ်ဓာတ်ကျဆင်းဖွယ် အခက်အခဲများ ရင်ဆိုင်ရသော်လည်း ဘဝကို အရှုံးမပေးဘဲ လဲကျပြန်ထစိတ်ဓာတ်ဖြင့် ရုန်းကန်ရာမှ အောင်မြင်မှုတစ်နေရာကို ပိုင်ဆိုင်ခဲ့ကြသူများအကြောင်းနှင့် သူတို့၏ အတုယူ အားကျဖွယ်စိတ်ဓာတ်အကြောင်းကို ဆောင်းပါးများခွဲ၍ ရေးသားမျှဝေထားခြင်း ဖြစ်သည်။

RESPECT (သက်ကြီး ဝါကြီး ပညာဉာဏ်ကြီးမြတ်သူများ) (မောင်ကိုကို (အမရပူရ)) (အတ္ထုပ္ပတ္တိ / ကိုယ်တွေ့မှတ်တမ်း)

ဆရာအောင်သင်း၊ မောင်စွမ်းရည်၊ ကိုလေး (အင်းဝဂုဏ်ရည်)၊ မောင်ပေါ်ထွန်း၊ မြန်မာမှုဒီဇိုင်း ဦးအေးမြင့်၊ ခင်ဆွေဦး၊ တယောဦးတင်ရီ၊ ဒဂုန်တာရာ၊ ဂုဏ်ထူးဦးသိန်းနိုင်၊ စန္ဒရားတင်ဝင်းလှိုင်၊ မောင်ဒီ၊ ပန်းချီခင်မောင်ရင်၊ ဝင်းဖေ၊ ကြီးမြင့်စော၊ ပန်းချီမောင်ညိုဝင်း၊ ကြည်အေး အစရှိသည့် စာချစ်သူများ လေးစားတန်ဖိုးထားရသည့် စာရေးဆရာများ ဘဝကို မည်သို့ဖြတ်သန်းရုန်းကန်ခဲ့ပုံ၊ သူတို့ကြုံတွေခဲ့သည့်ခေတ်စနစ်၊ လောကဓံအနိမ့်အမြင့် လှိုင်းလုံးများကြား ဘယ်လိုကူးခတ်ခဲ့ရပုံ၊ သူတို့၏ စာပေလက်ရာများအကြောင်းနှင့် အမှတ်တရများ အစရှိသည်တို့ကို အင်တာဗျူးပြုလုပ် မှတ်တမ်းတင်ထားခြင်း ဖြစ်သည်။

ကမ္ဘာကျော်ပန်းချီဆရာများရဲ့ဘဝ ကမ္ဘာကျော်ပန်းချီဆရာများရဲ့ ပန်းချီ (အတွဲ ၂) (မောင်ကျော်သာ (ပဲခူး)) (အတ္ထုပ္ပတ္တိ / ကိုယ်တွေ့မှတ်တမ်း)

ဒုတိယကမ္ဘာစစ်အတွင်း ဗုံးခိုကျင်းထဲ ခြင်ထောင်ချုပ်ခဲ့ရပြီး ပန်းချီဆွဲခြင်းကို အမေဖြစ်သူကမကြိုက်၍ တားမြစ်ခဲ့သော်လည်း ကမ္ဘာကျော်ပန်းချီဆရာမကြီးဖြစ်လာသူ ဂျပန်ပန်းချီဆရာမကြီး ယာဟိုးအိကုဆားမား၊ ၁၉၉၀ ဖိလစ်ပိုင်ငလျင်ဒဏ်ခံကာလအတွင်း တတ်ကျွမ်းသည့် ပန်းချီပညာဖြင့် ထောက်ပံ့ရေးအစီအစဉ်များလုပ်ဆောင်ခဲ့သူ ဖိလစ်ပိုင်ပန်းချီဆရာကြီး ဗင်နီဒစ်တိုကာဗရီရာ၊ အိန္ဒိယနိုင်ငံ ဘီဟာပြည်နယ် ရွာလေးတစ်ရွာမှ ဆင်းရဲသားမှသည် ကမ္ဘာကျော်ပန်းချီဆရာအဆင့် တက်လှမ်းခဲ့သူ ဆူးဘို့ဂူပတာအကြောင်း အပါအဝင်ကမ္ဘာကျော်ပန်းချီဆရာများ၏ ဘဝ၊ ပန်းချီပါရမီအထုံ၊ ပန်းချီအယူအဆတို့ကို ဖတ်ရှုကြရမည့် စာအုပ်ဖြစ်သည်။

NARRATOR HANDBOOK (Narrator လက်စွဲ) (သော်သဇင်မိုး) (ရည်ညွန်းစာပေ (အဘိဓာန် / စွယ်စုံကျမ်း / မြေပုံ / လမ်းညွှန်စာအုပ် / … ))

စာသားတစ်ခုကို အသံဖြင့် အသက်သွင်းပြီး နားထောင်သူ၏ စိတ်အာရုံထဲတွင် ပုံရိပ်များ ထင်ဟပ်လာအောင် တင်ဆက်ပေးသူ၊ စာဖတ်ပြရုံမျှမကဘဲ စာရေးသူ၏ စေတနာ၊ ခံစားချက်နှင့် ဆိုလိုရင်းကို နားထောင်သူ၏ နားထဲသို့ ရောက်ရှိအောင် ပို့ဆောင်ပေးရသည့် အသံဖြင့် ပုံဖော်သူ Narrator အကြောင်း၊ Narrator တစ်ဦးတွင် ရှိရမည့် အရည်အချင်း၊ ကျင့်ဝတ်၊ တတ်ကျွမ်းရမည့် နည်းပညာ အစရှိသည်တို့ကို FM Accouncer ဘဝမှသည် Narrator လောကထဲသို့ ရောက်ရှိခဲ့သူ စာရေးသူက ဤစာအုပ်တွင် အခန်း (၆) ခန်းခွဲ၍ ရေးသားရှင်းလင်းထားသည်။

လေ့လာစရာ သင်ရိုးသစ်မြန်မာသဒ္ဒါ (အေးကျော်မင်း) (ဘာသာစကား / ဘာသာဗေဒ)

ဆဋ္ဌမတန်း (Grade 6) မှ နဝမတန်း (Grade 9) အထိ သင်ရိုးသစ် မြန်မာသဒ္ဒါ၏ ထူးခြားချက်များ၊ အားသာချက်, အားနည်းချက်များကို အပိုင်း (၉) ပိုင်း ခွဲ၍ စေ့စေ့စပ်စပ် ခွဲခြမ်းစိတ်ဖြာ ရှင်းလင်းထားသော စာအုပ်ဖြစ်သည်။ သင်ကြားရေးနယ်ပယ်မှ ဆရာဆရာမများ၊ စာမေးပွဲအတွက် ပြင်ဆင်နေသည့် ကျောင်းသား ကျောင်းသူများ၊ မြန်မာစာကို လေ့လာနေသူများအတွက် စာအုပ်ကောင်းတစ်အုပ် ဖြစ်သည်။

၁၀ ဆ သီအိုရီ (“အောင်မြင်မှုနဲ့ ကျရှုံးမှုကြားက တစ်ခုတည်းသော ခြားနားချက်”) (TEAM NYĀNA) (သုတစာပေ)

Grant Cardone ရေးသားသည့် The 10X Rule: The Only Difference Between Success and Failure စာအုပ်ကို ဘာသာပြန်ဆိုထားခြင်း ဖြစ်သည်။ ကြိုးစားနေလျက် ကိုယ်လိုချင်တဲ့ ပန်းတိုင်ကို မရောက်သေးခြင်းသည် မိမိကိုယ်ကိုယ် သတိမထားမိသည့် ‘ပုံမှန်’ ဆိုသည့် အတိုင်းအတာတစ်ခုထဲတွင် မိမိကိုယ်ကိုယ် ကန့်သတ်ထားမိ၍ ဖြစ်သည်။ ယခုစာအုပ်ပါ ဆယ်ဆသီအိုရီတွင်မူ မိမိလိုချင်တဲ့ ပန်းတိုင်ကို ၁၀ ဆ မြှင့်တင်ရမည်ဖြစ်သလို ပန်းတိုင်ရောက်ဖို့ လိုအပ်သည့်အားထုတ်မှုကိုလည်း ၁၀ ဆ ထပ်တင်ရမည်ဟု ဆိုသည်။ ထိုသို့ထိရောက်ပြီး လက်တွေ့ကျသည့် ပညာကို ဤစာအုပ်တွင် အသေးစိတ် ရှင်းလင်းရေးသားထားသည်။ သာမန်ထက် ထူးချွန်သည့် အောင်မြင်မှုတွေဆီ လှမ်းတက်ဖို့ အဆင်သင့်နေသူတိုင်း ဖတ်ရှုသင့်သည့် စာအုပ်ဖြစ်သည်။

နွန်ချီ (“အောင်မြင်မှုနဲ့ ပျော်ရွှင်မှုအတွက် ကိုရီးယားတို့ရဲ့ လျှို့ဝှက်ချက်”) (သင်ဇာစိုးထင်) (လူမှုရေးနှင့် စိတ်ပညာ)

Euny Hong ရေးသားသည့် The Power of Nunchi: The Korean Secret to Happiness and Success စာအုပ်ကို ဘာသာပြန်ဆိုထားခြင်း ဖြစ်သည်။ ကိုရီးယားလူမျိုးများ လွန်ခဲ့သည့် နှစ်ပေါင်း (၅၀၀၀) ကျော်လောက်ကတည်းက အသုံးပြုခဲ့သည့် ရှေးဟောင်းအနုပညာတစ်ရပ်ဖြစ်သည့် နွန်ချီအကြောင်း အသေးစိတ် လေ့လာသိရှိရမည့် စာအုပ်ဖြစ်သည်။ စကားအများကြီးမပြောဘဲ အခြေအနေကို အကဲဖြတ်တတ်ခြင်း၊ ဘယ်အချိန်မှာ ဘာပြောသင့်လဲ, ဘယ်အချိန်မှာ နားထောင်သင့်လဲဆိုသည်ကို နားလည်သဘောပေါက်ခြင်း၊ လူတစ်ယောက်၏ မျက်နှာအမူအရာ၊ အသံနေအသံထားနှင့် စိတ်ခံစားမှုကို ခံစားတတ်ခြင်း အစရှိသော စွမ်းရည်ဖြစ်သည့် နွန်ချီ (Nunchi) အကြောင်း၊ နွန်ချီသည် စီးပွားရေး၊ ခေါင်းဆောင်မှု၊ လူမှုဆက်ဆံရေးတိုင်းတွင် လိုအပ်သည့် Soft Skill တစ်ခုဖြစ်ပုံနှင့် ၎င်းကို အသုံးချပုံများ ပါရှိသည်။

မပျော်ရွှင်သော နေ့ရက်များကို ဖြတ်ကျော်ခြင်း (နန္ဒာစာရ) (လူမှုရေးနှင့် စိတ်ပညာ)

ဗုဒ္ဓစိတ်ပညာကုထုံးကို အခြေခံ၍ အနောက်တိုင်း စိတ်ပညာအယူအဆများဖြင့် ပေါင်းစပ်ရေးထားသည့် စာအုပ်ဖြစ်သည်။ ပျော်ရွှင်ခြင်းကို ရှာဖွေတာမျိုးမဟုတ်ဘဲ မပျော်ရွှင်ခြင်းကို ဖြတ်ကျော်ရန် ပိုလိုအပ်ပုံ၊ စိတ်ကျဝေဒနာအကြောင်း၊ စိတ်ကျသူများတွင် တွေ့ရှိနိုင်သည့် လက္ခဏာနှင့် ခံစားရသည့်ပြဿနာများ၊ စိတ်ကျဝေဒနာကို ဗုဒ္ဓတရားတော်များဖြင့် မည်သို့ဖြတ်ကျော်နိုင်ပုံ အစရှိသည်တို့ကို ဇာတ်လမ်းဇာတ်ကွက်များနှင့်အတူ ပေါ့ပေါ့ပါးပါး ဖတ်ရှုကြရမည် ဖြစ်သည်။ စိတ်ပညာ အခြေခံရှိသူများ၊ Counsellor များအတွက် တွေးစရာတွေ အများကြီး ကျန်ခဲ့စေမည့် စာအုပ်မျိုးဖြစ်သည်ဟု ဆိုထားသည်။